CEBU, Philippines - Gidemalas ang usa ka 26-anyos nga ulitawo nga giingong hubog nga nagmaneho og motorsiklo human kini mobangga sa Ceres bus ug nakuyapan apan ang nakademalas kay nakuhaan kini og armas sa mirespondeng mga polis.
Ang aksidente nahitabo diha sa highway sa barangay Poblacion sa lungsod sa Argao niadtong Biyernes sa alas 10:00 sa gabii.
Ang nagtingkagol na karun sa karsel mao si Scubert Amarillo, 26, molupyo sa barangay Obaod bukirang bahin sa Argao human nakuhaan og kalibre .38 nga walay lisensiya nga duna pay unom ka buhing bala.
Matud ni PO2 Benjamen Gerozaga, desk officer sa Argao Police Station dihang nahinabi sa Banat News, si Amarillo sakay sa iyang motorsiklo paingon sa Poblacion ug nagsunod ang Ceres bus dunay body number 863 apan pag-abot sa maong lugar aksidenteng nadumbolan ang motor ni Amarillo hinungdan nga misaliring kini ug nakuyapan.
Si Amarillo giingong nakuyapan diha-diha pagkatagak sa motor ug wala kini suot nga helmet. Apan dihang gipunit na siya sa mga nangabot nga kapolisan aron dad-on sa tambalanan migimaw ang puloan sa maong armas diha sa iyang hawak.
Human madapati og tambal naulian si Amarillo apan sa iyang paggawas gilahos kini og tanggong sa karsel tungod kay pasakaan og kasong illegal possession of firearms.
Nasuta pa nga hubog kaayo si Amarillo dihang nagmaneho sa iyang motor.(EIM) (BANATNEWS)