Solar Bottle bulb ipakatap

CEBU, Philippines - Gitinguha sa kagamhanan sa lalawigan sa Sugbo nga ang solar bottle bulb (SBB) maapod-apod na ngadto sa tanang kalungsoran sa lalawigan aron makadaginot og kuryente ang mga Sugboanon.

Matud pa ni Vice Governor Agnes Magpale nga si Governor Gwendolyn Garcia mipaluyo sa ambisyosong tinguha sa Shelter Foundation ug Rotary Club Fuente Cebu nga ang SBB ikataud sa tanang kabalayan sa kalungsoran aron dili na sila magsalig sa paggamit og puro sugang dagitabnon sa paghatag og kahayag sa ilang sulod sa balay sa panahon sa ting-init.

Kini tungod kay ang SBB mao nay mohatag og kahayag pinaagi sa kemikal nga ania niini nga mosagop sa kahayag gikan sa adlaw ug ikapadan-ag sa sulod sa balay.

Ang SBB sayon ra kaayong himoon sa mga ordinaryong molupyo kay gamitan ra man kini og    usa ka litrong plastic nga basiyo sa softdrink nga sudlan og himabaw nga tubig dayon sagolan og duha ka kutsarang chlorine dayon itaod sa atop nga sin ug kun maigo kini sa kahayag sa adlaw mosiga kini sama sa 50 bohiyas nga bombelya nga sarang kaayong makahatag og kahayag sa sulod balay. Ang Public Relation Director sa Rotary Club Fuente Cebu nga si Maricel Borromeo-Amores nagkanayon nga si Gobernador Garcia miuyon na sa pagpakatap sa SBB pinaagi sa paglakip niini sa   Egwen program

Ang SBB dili lamang magamit sa balay apan mahimo usab kini sa mga opisina, eskuylahan ug uban pang   estraktura nga nagkinahanglan og kahayag sa sulod balay panahon sa adlaw.

Giluwatan sa gobernador ang desisyon sa pagpakatap sa SBB sa kalungsoran atol sa panagtagbo didto sa iyang buhatan nga gitambongan .ni Illac Diaz sa My Shelter Foundation, Rowena Alensonorin, Executive Director sa Integrated Development Unit sa Ramon Aboitiz Foundation Inc.(Rafi), mga official sa Mandaue Chamber of Commerce and Industry ug uban pa. (BANATNEWS)