Kanhi PDEA direktor mihimakak sa 'Pabalon'

CEBU, Philippines - Hugtanong gipanghimakak sa kanhi regional director sa Philippine Drug Enforcement Agency (PDEA) Central Visayas ang migawas nga report nga nakasikop sila og usa ka drug personality nga ilang gibuhian human mobayad niadtong Miyerkules.

Matud pa niini dihang gitawgan sa Banat News wala gyud siya’y kalabotan sa nahitabong operasyon sa mga ahente niadtong Miyerkules.

Si Adrian Alvariño kanhi regional director sa PDEA nga nahinabi sa Banat News pinaagi sa iyang cellphone kagahapon mipasabot nga niadto pang Septiyembre 15 mi-epekto ang iyang relieve order gikan sa ulohan nilang buhatan hinungdan nga pagkasunod adlaw wala na siyay gahom sa bisan unsang operasyon sa mga ahente sa PDEA.

“Wala nga akong alam, hindi ako ang kumander nila, wala akong operational control kay September 15 pa natanggap ko ang releved order ko,” pasabot pang Alvariño.

Ang maong reaksyon ni Alvariño kabahin kini sa migawas nga report kagahapong adlawa sa Banat News nga dunay usa ka drug personality nga subject sa buybust operation sa mga ahente sa PDEA diha sa sitio Riverside sa barangay Zapatera apan nakaikyas.

Apan ang mga sakop sa media ilabi na sa mga police beat reporters nakadawat og text message gikan sa usa ka tawo nga nagdumili sa pagpaila nga gidakop sa mga ahente sa PDEA ang ginganlan og Yongyong Vilaceran ug nakuhaan kini og walo ka bultong gidudahang shabu.

Matud sa maong mensahe nga gibuhian sa mga ahente ang suspek human gikatahong mihatag og P800 mil ngadto sa mga ahente aron kuno ipabawon sa gipalagpot nga kanhi regional director.

Gani kining maong operasyon gikumpirmar sa tigpamaba sa PDEA Jessie Tabanao nga duna silay operation niadtong Miyerkules sa gabii diha sa maong lugar apan nakaikyas ang ilang target ug ang ilang nadakpan mao lang ang usa ka panday apan ila kining gibuhian kay wala kini makuhai og mga ebidensya sa iyang posisyon.

Apan si Tabanao wala na mahatag pa og dugang detalye tungod kay matud pa niya wala siya makakuyog sa maong operasyon niadtong higayona.

Si Tabanao miingon nga ang iyang mga kauban gikan sa Zapatera midiretso sa sitio San Miguel sa barangay Apas ug mipahigayon na sab og buybust operation nga miresulta sa pagkasikop sa usa ka Ma. Shiela Pascual nga tag-iya’g karenderya nga nakuhaan og duha ka paketeng ang sulod gidudahang shabu.(EIM) (BANATNEWS)