Rama, city officials gikiha

CEBU, Philippines - Nag-atubang karon og kasong sibil si Cebu City Mayor Michael Rama ug ubang city officials kini tungod sa pagpatuman niini sa writ of demolition nga wala maghatag og cash assistance ug relocation site sa mga gipapahawang molupyo sa barangay Mabolo.

Ang mga molupyo sa sitio Magtalisay barangay Mabolo mihangyo sa korte nga moluwat og preliminary injunction ug temporary restraining order batok nila ni Rama, Roel Artes, head sa Squatters Prevention Encroachment Elimination Division (SPEED).

Ang mga kihante mao silang Lalaine Aliganga, Jenelyn Alinganga, Gina Arceo, Kristine Bargamento, Sofronio Batutuo, Angelina Calamba, Raul Oplado Sr. Carmelita del Mar, Lorna Del Mar, Lourdes Del Mar, Librada Jumao-as, Alfredo Lemit, Rosa Maria Jumao-as, Eduardo Llemit, Christopher Manatad, Estrella Maraba, Jerey Nuñal, Helen Opolentisima, Edwin Opolentisima, Rhea Remetio ug Jenifer Segovia.

Matud pa sa mga kihante nga ang ilang mga panimalay anaa mahimutang sa 3-meter radius sa kilid sa sapa nga iya sa nasud (Republic of the Philippines ) ug dili ang City of Cebu.

Dugang pa sa mga kihanti nga nagtukod na sila sa maong luna sa wala pa mapasar ang Republic Act 7279 kon Urban Development and Housing Act 1992.

Ang gobiyerno usab maoy mitukod nila og riprap apan nabara gihapon ug miawas tungod sa kahugaw ug sa mga gitukod nga dagkong edipisyo.

Ang mga kihante mibutyag nga kun mapadayon ang demolisyon nga walay court order ug walay itanyag nga relocation site ug financial assistance gilapas niini ang ilang katungod.

Ang mga mireklamo nangayo og P100 mil nga moral damages sa gabiing dili sila makatulog ug sa ilang kaguol ug P20 mil isip attorneys fee ug P2 mil kada appearance ug laing P20 mil alang sa litigation expenses. (BANATNEWS)