Suplay sa baboy di magkuwang sa Pasko

CEBU, Philippines - Gipahibawo ni Roland Tambago, presidente sa Central Visayas Pig Producers Cooperative (Cevippco) nga dili magkuwang ang ilang supply sa karneng baboy karun nga nagsingabot na ang kapaskuhan.

Si Tambago nga nahinabi sa Banat News nagkanayon nga dili usab nila pasubrahan ang supply kay basin unya dili mahalin tungod sa mga karneng imported nga padayong gipalusot karun sa mga dagkong negosyante diha sa kamerkadohan sa Central Visayas ilabi na dinhi sa Sugbu.

Ang ilang kooperatiba nga maoy apektado niini miapil sa monitoring sa mga imported nga karne nga ipalusot sa mga kamerkadohan. Gibutyag niya nga kada adlaw 2,200 ka baboy ang masuplay sa ilang pundok nga gipamaligya sa kamerkadohan.

Iyang giklaro nga wala hinuoy kalainan sa ilang supply matag adlaw gikan karun hangtud na sa Pasko sanglit ang mga tawo modangop naman lang sa litsong manok kay ila na kining nabantayan.

“Ang mga tawo mas mo-prefer sa litsong manok ini’g ka Pasko kay mas mahal man ang kinilo nga litsong baboy,” matud pang Tambago.

Hinuon ang ilahang gipangandaman nga basin magkulang sa suplay mao ang bulan sa Enero tungod sa Sinulog ug sa Sinulog Grand Parade nga dugokon gyud og mga turista.

Si Dr. Daisy Penetrante, city veterinarian sa dakbayan sa Mandaue nga gikahinabi sa Banat News kagahapon sa hapon mibutyag nga sa pagkakarun padayun nilang gihingusgan matag adlaw ang pag-monitor sa merkado sa mga gipalusot nga imported nga karneng baboy. Tambag ni Penetrante ngadto sa publiko ang timailhan sa imported nga karneng baboy mao nga bugnaw kaayo tungod kay gikan kini sa freezers.

Matud ni Penetrante nga delikado kaayo ang imported nga karneng baboy ilabi na kung kini gisegihan na og kupot, pislit sa mga tawo sanglit dili na kini presko ug sulod sa 30-minutos magkaanam kini og kadangog ug makontaminado ug delikado na sa panglawas sa tawo.

Mipahibalo si Penetrante nga dili sila magpanuko og sakmit kung may masakpan silang imported nga karneng ipalusot diha sa kamerkaduhan sa Mandaue ilabi na kung walay mapakitang meat inspection certificate.

Iyang giangkon nga karung umaabot kapaskuhan mosaka gyud ang supply sa karneng baboy gikan sa 25 ngadto sa 50 porsiyento ang demand sa mga tawo. (BANATNEWS)