7 establisamento sa Lapu' gisirad-an

CEBU, Philippines - Gipasirad-an ni Lapulapu City Mayor Paz Radaza ang lima ka mga internet café ug duha ka balay kahilayan gumikan sa kalapasan sa ilang Ordinansa sa siyudad ug nagnegosyong walay permiso gikan sa  Mayor.

Ang gipatak-opan mao ang Skai Internet Café, Burj Internet Café, Facebook Internet and Gaming Café, Pro Cyber Base, Roxxconn Internet Café.

Samtang ang duha ka balay kahilayan nga gipatak-opan mao ang Ernesto Patalinjug ug Tambayan sa Tabing Ilog.

Matud pa ni Radaza nasuta sa ilang monitoring nga ang maong mga internet cafés nagpasulod og mga tinun-an atol sa oras tingklase samtang ang maong mga balay kahilayan nagpasulod og mga minor de edad.

Aduna say pipila sa gipatak-opan ang giingong nag-operate nga walay business permits nga kalapasan sa City Ordinance No. 363-2006 ug ang Odinance No.070-2007 kun Revenue Tax Code kay walay business permit.

Mipasidaan si Radaza ngadto sa mga nagnegosyo og internet café ug balay kahilayan sa pagsunod gyud sa gilatid sa ordinansa sa siyudad.

Ang pito ka establisamento gipatak-upan human sa pipila ka higayon nga pahimangno apan nagpadayon kini sa maong kalapasan.

Si Rolando Duero ang City Secretary sa dakbayan miingon nga sa unang kalapasan tulo ka bulan nga suspensiyon ang ipahamtang; ikaduhang kalapasan unom ka bulan nga suspensiyon ug sa ikatulo mao ang pagpasirado sa maong mga establisamento. (BANATNEWS)