5 illegal fishers kasohan

CEBU, Philippines - Karung Lunes pasakaan na gyud sa kapolisan sa lungsod sa Daanbantayan ang lima ka mananagat nga nasikop tungod sa pag-dinamita nga giingong gibuhian sa kapolisan.

Sa pakighinabi sa Banat News sa hepe sa kapolisan sa Daan Bantayan Sr. Insp. Roseller Paller mibutyag kini nga “ready” na ang tanang papeles aron mapasakaan og kasong illegal fishing ang lima ka mangingisda ug ang pirma nalang sa barangay kapitan maoy kulang.

Ang mag-atubang sa maong kaso mao silang Rommel Pepito, 26, Mendes Mercader, 34, Julius Matinez, 19, Roel Formentera, 37 ug Tiburcio Casas, 37 nga pulos molupyo sa barangay Calapi sa maong lungsod.

Matud pa ni Paller nga may miscommunication ra ang nahitabo gani kagahapong adlawa nagpaabot usab sila ni Kapitan Virgilio Misa nga moadto sa ilang buhatan.

Apan dihang gitawagan sa Banat News si Kapitan Misa mibutyag usab kini nga nagpaabot usab siya sa kapolisan nga mopahibalo kaniya kun kanus-a siya moluwat og pamahayag alang sa isang-at nga kaso.

Aron makapirma na ang kapitan gipakuha nalang kini ni Paller ngadto sa ilang barangay nga adunay gilay-on nga 12-13 kilometro gikan sa sentro aron madala na ni Paller ang papeles ug masang-at ang kaso batok sa lima .

Samtang giklaro ni Paller nga walay kamatuoran ang nanggawas nga estorya nga adunay nagpugong kaniya nga mapasaka ang maong kaso tungod kay wala siyay gidapigan bisan kinsa.

Kahinumduman nga sa miaging adlaw mireklamo si Misa sa buhatan ni Governor Gwendolyn Garcia ug Cebu Provincial Police Office(CPPO) Director Patrocinio Comendador tungod kay gibuhian sa kapolisan ang lima niya ka dinakpan niadtong Miyerkules.

Nasuta nga gibuhian ang lima tungod kay lapas na ang reglamentary period apan wala pay kasong nasang-at. (BANATNEWS)