2 SK chairman positibo sa drugas

CEBU, Philippines - Nagpositibo gyud sa confirmatory test ang duha ka mga Sangguniang Kabataan chairmen nga unang napositibo sa surprise drug test nga gimando sa dakbayan sa tanang opisyales sa kabataan sa dakbayan.

Ang duha ka mga SK chairmen pulos gikan sa mga bukirang barangay sa dakbayan sa Sugbo nga sakop sa north ug south districts.

Nagdumili hinuon si SK Federation (SKF) President John Philip Po pag-ila sa duha ilabi na nga pulos sila mga menor de edad.

Nadawat ni Po ang maong resulta niadtong Miyerkules gikan sa buhatan sa Philippine National Police Crime Laboratory ug Office for Substance Abuse Prevention nga gipangulohan ni Joey Hererra.

Dugang pa niya nga wala sa ilang constitution and by-laws sa SKF nga makapahamtang og silot sa ilang mga sakop nga masakpang mogamit og ilegal nga drugas.

Apan modangop sila sa Department of Interior and Local Government aron paghimo og mga lakang kabahin niini. Apan gipaniguro niyang ilaha silang tabangan aron makabiya sa ilegal nga drugas.

Masaligon si Po nga dili madaot ang imahe sa SK sa maong hitabo sanglit siya man gyud ang nag-request aron ipa-drug test ang mga SK chairmen aron masayran gyud kung kinsa kanila ang angayan tabangan nga dili na mag-usab sa maong bisyo.

Nasayran nga sa miaging buwan gihimo ang surpresang drug testing sa mga SK chairman sa dakbayan diin mitumaw nga duha sa mga SK chairmen ang tiggamitan og ilegal nga drugas. (BANATNEWS)