Illegal fishers gibuhian

CEBU, Philippines - Midangop sa buhatan ni Gov. Gwendolyn Garcia ang kapitan sa Malbago lungsod sa Daan Bantayan ug mireklamong gibuhian sa kapolisan ang lima ka mga ilegal fishers nga ilang nadakpan.

Si kapitan Virgilio Misa, mibutyag sa Banat News nga nakugang nalang siya niadtong Miyerkules sa buntag nga miadto na sa ilang panimalay ang lima nga dinakpan kay nagpasalamat nga wala sila kasuhi.

Kini mao silang Rommel Pepito, 26, Mendes Mercader, 34, Julius Matinez, 19, Roel Formentera, 37 ug Tiburcio Casas, 37 nga puros molupyo sa barangay Calapi sa maong lungsod.

Matud pa ni Misa gikatakda unta nilang pasakaan og kaso ang lima.

Midugang si Misa nga giingnan lang siya ni PO2 Alfredo Mandal nga hapiton unta siya sa ilang panimalay apan gikatahong mibutyag ang ilang hepe nga dili una ipasaka ang maong kaso.

Tungod niini, nakadesider si Misa nga ipaabot ang maong problema ngadto sa buhatan ni Governor Gwendolyn Garcia ug sa hepe sa kapolisan sa lalawigan sa Sugbo Sr. Supt. Patrocinio Comendador.

Sumala pang Misa si Comendador mitambag na kaniyang ipadayon ang pagpasaka sa kaso samtang gipasalig niining susihon ang pasangil ni Misa.

Si PO2 Mandal dihang gikahinabi sa Banat News mibutyag nga ilang gibuhian ang lima ka dinakpan tungod kay walay complainant ug milapas na ang reglamentary period.

Nasayran nga niadtong Lunes sa buntag nasikop ang lima human kini gikatahong naaktuhan ni Misa uban sa iyang duha ka tanod nga naglabay og dinamita sa kadagatan. (BANATNEWS)