Subdivision gipahunong

CEBU, Philippines - Human sa mga reklamo sa homeowners sa Corona del Mar Subdivision si Mayor Socrates Fernandez sa milabay’ng adlaw miisyu og cease and desist order batok sa Filinvest Development Corp. (FDC) nga maoy nag-develop niini diha sa barangay Pooc, dakbayan sa Talisay.

Giingong ang Filinvest dunay nahimong kalapasan tungod kay giisyu nga permit sa siyudad ngadto kanila mao lang ang pag-develop sa lugar ug walay labot ang pagtukod og balay.

Ang FDC kinsa maoy developer sa Corona Del Mar giingong nag-develop og bag-ong subdivision diha sa sikbit nga lugar ug ang mga heavy equipment nila anha motadlas sa dalan sa Corona Del Mar nga gikabalak-an nilang makaguba niini ug delikado usab sa mga bata.

Ang homeowners pinangulohan sa igsuon ni Gov. Gwendolyn Garcia nga si Byron Garcia mipadangat sa ilang reklamo ngadto sa mayor sa milabay’ng adlaw.

Ang homeowners girepresentahan ni Garcia, usa ka representante sa FDC ug kapitan sa barangay Pooc nga si Dory Emit nakigtagbo ni Fernandez niadtong Miyerkules sa hapon. Nahitabo kini human gipangtangtang sa mga gwardiya sa FDC ang barikadang gibutang sa homeowners lakip na ang sakyanan ni Garcia aron unta babagan ang mga heavy equipment nga makaagi padulong sa gi-develop nga laing subdivision.

Si Garcia ang mibahad nga mopasaka og kaso batok sa mga mipadaplin sa iyang sakyanan nga iyang gibabag sa karsada.

Sa report sa ABS-CBN Central Visayas nga pasado alas 9:00 sa buntag gi-serve sa Zoning Task Force ang notice of violation batok sa FDC. Giingong ang development permit nga giaprobahan sa siyudad nagtugot lang kini sa pag-develop diha sa Escala apan nahibulong ang siyudad nga dunay gitukod nga pito ka balay ug mga modernong balay diha sa maong lugar. (EIM) (BANATNEWS)