CEBU, Philippines - Layo pa ang piniliay apan hinay-hinay nang nabatyagan sa mga molupyo sa dakbayan sa Toledo nga sikit kung dili man higpit ang umaabot unyang mga mag-atbangay sa bugnong lugaynon.
Kini gumikan sa mga nanggawas nga mga tarpaulins nga daw agi og tubag o ba kaha pahibalo sa katawhan kabahin sa mga libreng serbisyong ilang nahatag o mahatag pa.
“Dili kay karon pa, dugay na. Dili kay karon lang sa tanang panahon,” sumala pa sa mga dagkong tarpaulins nga giingong gipataod nila ni Mayor Rudy Espinosa, Vice Mayor Arlene Zambo ug 3rd district Congressman Pablo John Garcia sa siyudad sa Toledo .
Ang maong tarpaulins giingong nagpasalig sa mga residente nga 24-oras nga adunay medical mission sa Toledo District Hospital (TDH) ug sa Vicente Sotto Memorial Medical Center (VSMMC).
Kini giingong gitaod human nagpahigayon og medical mission ang kanhi senador nga si John Henry Osmeña ug kanhi kongresista Antonio Yapha Jr. sa maong siyudad.
Si Osmeña ug Yapha gidungog nang mokandidato sa umaabot nga piniliay.
Sa gipadalang pamahayag sa kampo sa Alagad, ang kapitan sa barangay Poblacion nga si Faustino Barcenas mibutyag nga ang mga tarpaulins gitaod niadtong Miyerkules sa milabay’ng semana human nabalita nga ang ilang barangay mao’y sunod nga venue para sa Alagad Medical Mission nga gipasiugdahan ni Osmeña ug Yapha.
Niadtong milabay’ng semana 2,000 ka residente ang nakapahimos sa maong medical mission nga sagad nagpakonsulta sa nagkalain-lain nilang sakit tungod kay libre lakip na ang mga medisina nga gigastohan og P300,000.
Giingong problema sa maong barangay ang kakulang sa mga medisina sa ilang health center. Si Yapha usab miingon nga ang mga doktor ug dentista sa iyang grupo nga miboluntaryo matag Domingo para sa Alagad apan siya miklarong wala sila makigkompetensiya sa mga medical missions nila ni Espinosa, Zambo ug Garcia.
Matud pa usab ni Osmeña nga ang kadaghanon sa mga residente maoy nagsilbing ebidensya nga dako ang ilang panginahanglan ug hinabang medical. “Makita man na nato, sa kadaghan sa mga miapil og pareha ra ang ilang yangungo, walay tambal, kuwang sa tambal, panagsa ra hikit-an,” matud pa ni Osmeña sa maong pamahayag.
Ang sunod nga Alagad Medical Mission ipahigayon sa barangay Cambang karong Oktubre 2 ug naa kini’y permit gikan sa regional unit sa Department of Health.(EIM)(BANAT NEWS)