Ahenteng mangingilad gisikop sa estambay

CEBU, Philippines -  Napaslak sa prisohan ang usa ka tawo nga nagpailang ahente og bugas human hidakpi sa mga migukod kaniyang mga estambay didto sa barangay Yati sa lungsod sa Liloan kagahapon sa alas 8:30 sa buntag.

Ang suspek mao si Romeo del Rosario, 47 , minyo, nga taga barangay Tayud sa lungsod sa Consolacion, kinsa nagpaila nga ahente sa Atlas Milling Rice and Corn Supply sa dakbayan sa Mandaue.

Samtang ang biktima mao si Al Inoc, 38, minyo, nga taga Liloan ug may tindahan og bugas sa maong lugar.

Si PO2 Rutchell Jugalbot sa Liloan Police mibutyag sa Banat News nga miadto ang suspek sa  tindahan sa biktima kay nanganbas bahin kunohay sa baligya nilang bugas ug gipasil-ing pa ang biktima sa usa ka sakyanan nga nagdiskarga og bugas dili layo sa iyang tindahan.

Ang biktima nga dali kaayong nakombinse, mitunol dayon sa iyang P2,080 isip downpayment sa gi-order niyang 3 ka sakong bugas humay   sa pagtuo nga ihatod dayon kini ug ang kuwang unya na bayri inig-abot na sa bugas.

Apan human madawat ang kuwarta giingong mipaingon ang suspek ngadto sa trak nga nagdiskarga og bugas, apan naamgohan sa biktima nga misakay kini og traysikol pahilayo sa maong lugar.

Dihang namatngonan sa biktima nga nailad siya, iyang gigukod ang traysikol nga gisakyan sa suspek    ug uban sa iyang mga katabang sa tindahan, ilang naapsan ang suspek didto sa highway.

Uban sa mga estambay sa maong lugar nga mitabang sa biktima, nasikop ang suspek ug ila kining gitunol ngadto sa kapolisan sa lungsod.

Human mabawi ang kuwarta, gipaslak dayon ang suspek sa prisohan samtang   gipaabot ang biktima nga mosang-at og tukmang kiha batok sa suspetsado.(WC)(BANAT NEWS)