Ahente gipusil sa tulisan

CEBU, Philippines -  Samad sa tuong abaga ang naangkon sa usa ka ahente human gipusil sa usa sa duha ka armadong tulisang buot untang motulis kaniya kagahapon sa kaadlawon diha sa Latresas Drive, Tres De Abril sa barangay Labangon sa dakbayan sa Sugbu.

Si Karl Francis Niño Gemino Remegoso, 25, sales agent sa Cebu Atlantic Hardware nga taga 630B Tres De Abril sa maong barangay ang anaa karun sa Chung Hua Hospital tungod sa samad pinusilan sa abaga.

Ang biktima mitug-an sa mga imbestigador sa Homicide Section pinangulohan ni SPO1 Victor Ruel Ayuman nga padulong na siya pauli sa balay gikan miparking sa iyang sakyanan dihang gihunongan siya sa duha ka wala mailhing lalaki ug ang angkas nangutana kun asa agion ang paingon sa lungsod sa Minglanilla.

Nakugang nalang siya dihang kalit siyang gitionan sa duha og armas ug gipangayo ang iyang butang. Gisuwayan unta niya pag-ilog ang armas apan mibuto kini ug naigo sa iyang tuong abaga.

Bisan kun samaran na si Remegoso midagan kini paingon sa security guard nga nagbantay di layo sa nahitaboan ug maoy mitabang kaniya pagdala sa tambalanan.

Ang duha ka tulisan daling misibat sa lugar human moabot ang igsuon sa biktima nga nakadungog og buto sa armas ug nadunggan pa ang usa sa tulisan nga misinggit og ‘naay polis’ dayong sutoy palayo. (BANAT NEWS)