Kapalaran sa water dispenser masayran karon

CEBU, Philippines -  Ipahigayon karong adlawa sa konseho sa dakbayan sa Sugbo ang katapusang deliberasyon sa ordinansahong Vending Machine Ordinance nga nagtinguha sa pagkontrolar sa   mga water dispenser nga giladlad karon sa kadaplinan sa kadalanan ning dakbayan sa Sugbo.

Gipangamahanan ni Konsehal Michael Ralota, ang maong ordinansa nagbuot nga dili angay sayun-sayonon lang sa mga negosyante ang pagpabarog og water vending machine sa kadalanan ning siyudad gawas kun makalukat siya og clearance, permit ug uban pang mga dokumento nga nagsubay sa sanitary code sa dakbayan.

Sa mga papeles nga lukaton sa moladlad og water dispenser, matino nga limpyo ang tinubdan sa tubig ning mga negosyantiha kay dili man sila kaluwatan og permiso kun nilamo-lamo lang ang tubig niini nga isulod sa ilang mga gallon.

Sa samang higayon sutaon usab kun maayo bang pagkalimpyo ang mga gallon nga sudlan sa tubig ug labaw sa tanan una kini patuwara nianang mga dispenser, hininloan ba kining mga galona sa motaod niini  diha sa dispenser.

Kun dili kini masuta sa mga otoridad, delikado kaayo ang panglawas sa katawhang manginom ning tubiga kay basin hugaw kini ug ang makainom maoy mag-antos unya sa makamatay nga sakit gikan sa maong tubig.

Gimando usab sa maong ordinansa nga ang dispenser nga luwatan og business permit sa City Treasurer’s Office (CTO) kinahanglang papitlan og sticker sa maong buhatan nga maoy sil-ingon sa kustomer nga kini tinuod nga limpyo.

Samtang ang City Health Department (CHD) dako kaayo og papel sa maong negosyo kay mao kini mosuta kun limpiyado ba ang negosyanteng moladlad og water dispenser ug ang tingog sa CHD maoy basehan sa CTO sa pagluwat og permiso sa maong patigayon.( WC)(BANAT NEWS)