CEBU, Philippines - Patay ang 7-anyos nga batang lalaki nga tinun-an sa grade-one ug apo sa retiradong polis human kini madasmagi og Ceres bus samtang naglakaw daplin sa karsada paingon na untang mopauli human sa klase sa highway sa barangay Banhigan sa lungsod sa Dalaguete kagahapon sa alas 11:45 sa udto.
Ang biktima mao si Andrie Villahermosa Jancinel, 7, tinun-an sa Banhigan Elementary School ug molupyo sa nahisgutang lugar.
Samtang ang nakadasmag nga bus gikan pa sa Dumaguete City paingon unta sa siyudad sa Sugbo nga gimaneho ni Jerry Tagalog, 48, taga Zamboangita Negros Oriental.
Matud ni SPO1 Ethel Teves sa Dalaguete Police Station dihang nahinabi sa Banat News nga mao pay pagpanggawas gikan sa klase sa mga bata sa maong tunghaan ug ang biktima gikatahong mitabok kini sa pikas nga bahin sa karsada dihang nadasmagan sa bus.
Ang mga estambay na ang mitabang sa biktima ug gihatud kini sa Cardinal Rosales Hospital apan patay na kini. Sa kahadlok sa drayber wala kini mohunong ug didto na sa kapulisan sa lungsod sa Argao boluntaryong mitahan.
Matud ni PO2 Benjamen Gerozaga sa Argao Police Station dihang nahinabi sa Banat News, alas 12:10 na mitahan ang drayber ug gipabalhin nalang ang mga pasahero og laing kasakyan. (BANAT NEWS)