Mipasilong gipatay

CEBU, Philippines - Patay ang usa ka tinun-an sa Information Technology (IT) human gipusil sa ulo samtang kini mipasilong sa usa ka panimalay tungod sa kalit nga pagbundak sa kusog nga ulan sa miaging gabii sa sitio Kauswagan sa barangay Bankal, dakbayan sa Lapulapu.

Ang namatay giila nga mao si Darrel Delfin dela Peña, 19, tinun-an sa IT sa University of Cebu Lapulapu and Mandaue (UCLM) ug nagpuyo usab sa maong dapit.

Gipangita karon sa kapolisan ang usa ka naila sa pangalang Kayel Aying kinsa maoy gitumbok nga kalit mipusil sa biktima.

Si SPO1 Manolito Abellanosa sa Homicide Section miingon nga gikan pa sa eskwelahan ang biktima ug sa pagkanaug niini gikan sa traysikol kalit mibundak ang kusog nga ulan.

Daling mipasilong ang biktima apan giduol kini sa suspek ug kalit gipusil dayong sibat palayo. Ang biktima gidala sa mga kabanay sa Mactan Doctors Hospital apan namatay kini. Ang kapolisan nagdudang nasaypan lamang ang biktima. (BANAT NEWS)