CCTV camera vs krimen gitinguha ni Cortes

CEBU, Philippines - Nunot sa mga nagsunod nga mga krimen sa dakbayan sa Mandaue nagtinguha si Mayor Jonas Cortes sa pagbutang og mga CCTV cameras sa matag eskina sa mga dalan sa dakbayan.

Kini aron makatabang unya sa imbestigasyon sa kapolisan kung adunay mahitabong krimen sama sa nahitabo sa mga nangaging adlaw diha sa maong dakbayan nga mikalas na og duha ka mga negosyante.

Ang duha ka negosyanteng sila si Antonio Ouano ug Irish Hugo Gonzales nga pulos namatay sa buwag nga mga hitabo pulos biktima sa ambush sa mga nagsakay og motorsiklo.

Si Ouano gipusil patay sa miaging bulan sa duha ka tawo nga nagsakay og motorsiklo apan bisan sa dakong kantidad nga gitanyag nga ganti alang ni bisan kinsa nga makatudlo sa mamumuo sa biktima wala pa gihapoy napasakaan og kaso.

Gisundan kini sa pagbanhig sa laing negosyante nga si Irish Hugo Gonzales nga gipusil patay usab sa duha ka wala hiilhing lalaki nga nagsakay og motorsiklo. Si Sr. Supt. Noel Gillamac miingon nga professional hired killers ang mga mamumuno sa duha ka magpapatigayon. (BANAT NEWS)