Supplier mosuporta sa Capitol
CEBU, Philippines - Hugot nga mosuporta ang 31 ka mga supplier sa Kapitolyo sa Cebu City Beautification Project sa dalan Osmeña Boulevard ning siyudad sa Sugbo nga gipasiugdahan ni Governor Gwendolyn Garcia .
Kini ang nakab-ot nga kalamboan sa gipahigayong tigom sa gobernador sa milabay’ng adlaw tali sa 31 ka mga supplier sa Kapitolyo.
Ang nahisgutang mga supplier bulontaryo nga misuporta sa gobernador sa pag-abaga sa lighting project tali sa Osmeña Boulevard ug Kapitolyo.
Matud pa ni Bien Rodriguez, plant manager sa Cebu Federation of Dairy Cooperatives (CEFEDCO) nga gikalipay nila og dako kaayo nga ang gobernador miawhag kanila sa pagtabang sa pagpaanindot sa Sugbo.
Kini tungod kay dako usab kaayo ang ilang garbo nga makatampo sa pagpalambo ug pagpanindot sa siyudad.
Samtang si Provincial Engr. Eulogio Pelayre mitug-an nga uyon gayud ang mga supplier nga moamot sa kalampusan sa maong proyekto ug bulontaryo silang moabaga sa bayronon sa mga suga nga itaod sa kadalanan nga paanindoton.
Nasayran nga kapin sa P2.4 milyones ang kantidad sa mga suga nga mobarug unya tali sa Osmeña Boulevard ug Kapitolyo diin mao kini bahinon sa mga supplier sa Kapitolyo. (BANATNEWS)
- Latest
- Trending
