Cabando ug kaubanan kasohan

CEBU, Philippines - Karung semanaha gikatakdang mapasaka ang kaso batok sa lider sa Quiapo-Cabando Robbery Group nga mitulis sa teller sa China Bank sulod sa Robinsons Department Store niadtong Septiyembre 5.

Si Sr. Supt. Melvin Ramon Buenafe, hepe sa Cebu City Police Office (CCPO) mipahibawo sa mga tigbalita nga human makuha ang mga affidavits sa tanang mga testigo ilaha na kining isumiter.

Lakip sa gikuhaan og affidavits mao ang teller nga si Lewin Sorig ug sila si PO1 Roy Ceniza ug PO1 Elrich Catacutan kinsa nangaangol sa maong hitabo.

Kasong robbery with homicide ang ilang ipasaka batok kang Dionesio Cabatingan alyas Junjun Cabando, nga gitumbok nga lider sa Quiapo-Cabando Robbery Group ug laing upat ka John Does nga kuyog ni Cabando paingon didto sa Panglao, Bohol sa ilang pagsibat dinhi sa dakbayan sa Sugbu.

Ila usab iapil sa pagpasaka og kaso isip accessory to the crime ang managsuong sila si Maricel Magadan ug ang kapuyo ni Cabando nga si Merly Lagitao.

Giklaro ni Buenafe nga dili nila iapil sa pagpasaka og kaso ug himuon nilang witnesses ang tag-iya sa ‘Inday Irish’ nga pumpboat nga si Marino Ochea, operator nga si Luisito Obrero ug ang pahinante nga si Antonio Balingit nga taga Talisay nga maoy mihatud nila ni Cabando, Lagitao ug   mga kaubanan didto sa Bohol duha ka adlaw human sa pakyas nila nga pagpanulis sa teller sa China Bank.

Gipasabot ni Buenafe nga ilang nasuta human sa imbestigasyon nga diha na makaila sila si Obrero ug Balingit sa lawod nga si Cabando ang ilang pasahero paingon sa Panglao.

Gipadayag sa duha nga ilang nailhan si Cabando pinaagi sa balita sa telebisyon human sa ilang pagpanulis nianang pagka Lunes.

Matud ni Buenafe nga laing kaso usab ang ilang ipasaka nga kasong frustrated murder batok ni Cabando ug upat ka John Does (EIM) (BANATNEWS)