Luigi mimando sa PDIC depositor bayran

CEBU, Philippines - Si 6th district Cong. Gabriel Luis R. Quisumbing mipahinumdom sa mga tagdumala sa Bangko Sentral ng Pilipinas (BSP) ug sa Philippine Deposit Insurance Company (PDIC) sa paghimo og dinaliang lakang aron makobra pagbalik sa mga depositor sa bangkong gitak-opan ang ilang mga salapi.

Kini samtang   si Quisumbing mipadayag sa iyang kahingawa sa gidangatan sa mga depositor sa LBC Development Bank kinsa gipaubos na karon sa BSP Cebu City Branch   sukad pa niadtong Sept. 9, 2011.

Matud pa ni Quisumbing, “There are even reports that many of the LBC Bank’s depositors are Overseas Filipino Workers (OFWs) and their families, considering the said bank’s tie-up with the courier and remittance company LBC express. In such case, it is urgent that the depositors get their hard-earned money back. We call upon the concerned agencies, the BSP and the Philippine Deposit Insurance Company (PDIC) to work overtime in paying back the depositors’ claims.”

Hinuon ang PDIC mipasalig nga ang mga depositor nga nakadeposito og P500 mil paubos sigurado nang maulian sa ilang kwarta.

Apan ang refund sa kwarta sa mga depositor nga nakadeposito og kapin sa tunga sa milyon ka pesos mag-agad lamang sa liquidation sa asset sa bangko.

Si Quisumbing miingon nga ang maong sitwasyon maoy nakatukmod sa pag-review sa kasamtangang standard ug banking regulation sa BSP. 

Matud pa ni Quisumbing nga gikinahanglan nilang masusi ug makita ang report nga ang LBC bank mi-offer og mas taas pa sa average interest rate alang sa mga deposito.

Iyang gitataw nga kun may kamatuoran ang maong report, ipasusi usab niya nganong ang dili maayong banking practice wala madiskita-i dayon sa BSP.

Nunot niini, si Cong. Quisumbing mipahibawo nga niduso na siya sa House Resolution 1729 nga naghangyo sa House Committee on Banks and Financial Intermediaries nga moahigayon og inquiry in aid of legislation sa kahimtang ug kalig-on sa tanang mga bangko sa tibuok nasud apil na ang pagsusi sa standard and regulation nga gisetar sa BSP sa operasyon sa mga bangko dinhi sa nasud. (WC)(BANAT NEWS)