Kagawasan gamiton sa maayo - Palma

CEBU, Philippines - Kamatuoran ug patas nga paghatud sa balita mao ang numero unong gihatagan og pagtagad ni Arschbishop Palma nga maoy iyang mensahe ngadto sa sakop sa media sa pagbukas sa tinuig nga Press Freedom Week kagahapon sa social hall sa Provincial Capitol.

Gisangyaw kini ni Palma atol sa pagsaulog sa Santos nga Misa ug iyang gidasig ang media nga kanunay nga ipalutaw ang kamatuoran samtang nagpadayon sa paghatud og serbisyo sa komunidad.

Gipahimangnuan usab ni Palma ang media nga tan-awon ang kamatuoran nga may limitasyon ang kagawasan aron dili kini abusaran.

Sumala pa niini ang mga sakop sa media karon maoy maayong ehemplo alang sa mga batan-ong tinun-an nga gustong mosulod sa maong propesyon.

“Freedom is to do good and what is ought for the society and it is also a gift that must be use in doing good,” matud pa ni Palma.

“We shall always know the truth and that the truth with a capital T, shall make you free,” pasabot pa niini.

Gitapos ni Palma ang selebrasyon sa Santos nga Misa sa pag-abiba sa kagawasan sa mga sakop sa media nga diin sa sayo pa iyang gidayeg gumikan sa natampo sa maong sektor sa katilingban ug sa Diyos.

Ang nagkadaiyang tri-media outfits dinhi sa Sugbu nagparada gikan sa Cebu City Hall ngadto na sa Provincial Capitol sa barangay Capitol Site diin gihimo ang Santos nga Misa.

Sama sa naandan, pipila sa mga tigbalita ug uban pang staffs sa nagkadaiyang newspaper ug broadcast media ang nakadawat og mga premyo nga gipaagi sa raffle. Migawas nga mananaug sa Star of the Show ang Sunstar, sunod ang Broadcast media (KBP) ug The Freeman/ Banat News samtang ikaupat ang Cebu Daily News. Ang Broadcast media usab maoy napiling Star of the Parade. (BANAT NEWS)