Simbahan ok nga usbon ang RA 9344

CEBU, Philippines - Lakip na usab karon ang Simbahan sa mga mipadayag ug misuportang tun-an pag-usab aron usbon ang Republic Act 9344 o ang Juvenile Justice and Welfare Act of 2006.

Mismo si Cebu Arsobispo Jose Palma ang nagkanayon nga nakita niyang resonable ang awhag sa nagkadaiyang sektor kabahin sa pagpaubos sa edad gikan sa 15-anyos sa mga batan-on nga pwedeng mabilanggo kun makahimo og krimen.

Nasayran nga pipila ka mga grupo ilabi na ang mga magbabalaud ang nagkanayon nga nausik lang ang Republic Act 9344 tungod kay mas nagkadaghan hinuon ug nagkagrabe ang mga krimen nga ang numero unong nalambigit mao ang mga menor de edad.

Niining bag-o lang, usa ka 16-anyos nga batan-on ang gipasanginlang mipatay sa linuog nga pamaagi sa iyang kaugalingong mabdos nga inahan ug iyang manghod nga 5-anyos.

Apan gawas sa pag-usab sa maong balaudnon, si Palma mitambag nga numero uno gihapong paagi aron malikayan ang maong mga ngil-ad nga panghitabo mao ang pag-ampo ug pagpalig-on sa relasyon sa matag miyembro sa pamilya.

Sa laing bahin, mga Sugbuanong politiko ang mipadayag usab sa ilang dakung pagsuporta sa pag-usab sa maong balaodnun.

Sila si Cebu second district representative Pablo Garcia ug Cebu Vice Mayor Agnes Magpale nga usa sa mga tigpanalipod sa katungod sa kababayen-an ug kabataan sa Sugbu mipadayag nga angayan na gyung usbon ang maong balaod.

Si kanhi Cebu Arsobispo Ricardo Cardinal Vidal ug Manila Archbishop Gaudencio Rosales sa usa ka interbyu sa mga tigbalita sa milabay’ng semana mipadayag usab sa pagsuporta sa maong balaod.

Si Vidal ug Rosales nagkanayon nga nagkadaghan na ang kabataang nalambigit sa krimen. (BANAT NEWS)