Naaktuhang namaligya'g shabu

CEBU, Philippines - Natiklo sa nagpatrolyang mga sakop sa kapulisan ang gidudahang tigpayuhot og gidiling drugas sa sitio Camolinas barangay Poblacion sa lungsod sa Cordova niadtong Biyernes sa alas 3:30 sa hapon.

Ang nasikop nga suspek mao si Luigi Fernandez Degamo, 33, molupyo sa nahisgutang lugar kinsa nakuhaan og napulo ka gagmay’ng plastik nga dunay sulod nga gituohang shabu ug laing usa ka basiyo sa sachet nga gituohang gisudlan gihapon sa gidiling drugas.

Matud ni SPO1 Laurencio Wagwag sa Cordova Police Station dihang nahinabi sa Banat News ang suspek ug laing duha ka lalaki nga gituohang mga adik nga wala makuha ang mga pangalan naaktuhang nagtransaksiyon sa ginadiling drugas sa maong lugar.

Ang nagpatrolyang grupo ni PO2 Charlie Valmoria nga nakakita sa grupo daling miduol ug midakop kang Degamo apan nakadagan ang duha ka customer niini.

Samtang gikapkapan ang suspek nakuha pa ang laing plastic diha sa bulsa niini ug dihang giablihan dunay sulod nga laing 6 ka paketeng sachet nga dunay sud nga gidudahang shabu. (BANATNEWS)