BIN nangayo dugang allowance

CEBU, Philippines - Gipahibalo sa chief executive ni Mayor Michael Rama nga si Phillip Zafra nga mihangyo ang Barangay Inteligence Network (BIN) nga patas-an ang ilang allowance.

Nasayran nga P100 lang matag adlaw ang kasamtangang allowance nga gidawat sa 153 ka mga BIN sa siyudad sa Sugbo.

Sumala pa ni Zafra nga tun-an sa buhatan sa mayor ang hangyo sa BIN sanglit nagdepende kini sa budget sa siyudad.

Dugang pa niya nga balido ang rason sa BIN kung nganong angayan tagaan og increase ang ilang allowance.

Sumala pa ni Zafra nga lisod na kaayo ang panahon karon ug dili igo ang P100 alang sa pagbuhi og pamilya.

Matud pa niya nga pamilyado ang kasagaran nga mga sakop sa BIN. Samtang gitun-an pa ang proposal sa BIN, gisaysay ni Zafra nga angayan nga ipakita sa maong grupo ang pagpalig-on sa ilang serbisyo ngadto sa katawhan aron madugang kini sa himuong basehan nga patas-an ang ilang allowance.

Hinuon wala mohatag ang BIN og kantidad sa increase nga ilang gipangayo sanglit nag-agad lang kini sa desisyon sa mga opisyales sa siyudad.

Ug ang maong grupo nanghinaut nga dunggon sa siyudad ang ilang hangyo. (BANATNEWS)