Illegal recruiter kasohan na

CEBU, Philippines - Pormal nang ipasaka ugma ang kaso batok sa upat ka mga illegal recruiter nga taga lungsod sa Carmen kinsa nasikop sa kapolisan didto sa lungsod sa Tuburan   sa miaging adlaw.

Gibutyag ni SPO2 Simplicio Gibo sa Carmen Police Station sa Banat News nga  giandam na nila ang   mga apidabit sa 23 ka mga biktima kinsa mireklamo ngadto sa kapolisan nga gipangayoan sila og dagkong kantidad nga salapi nga bugti kunohay sa trabaho didto sa gawas nga dili tinuod.

Ang pasakaan og kaso mao si Emma Condevillamar, 59, minyo, ug duha niya ka mga anak nga sila si Eve Condevillamar Laguna, 36, minyo, ug ang igsoon niini nga si Evy Condevillamar, 38, minyo, tanan pulos taga Poblacion, Carmen, ug ang ilang katabang nga si Ma. Gemma Asada, hingkod nga taga Dunggoan, siyudad sa Danao.

Kasong kalapasan sa R.A. 8042 kon Migrant Workers and Overseas Filipinos Act of 1995 ang atubangon sa mga suspek nga nagtingkagol karun sa karsel sa Carmen.

Si Emma ug Eve nadakpan niadtong Huwebes sa hapon didto sa barangay Cogon, ug giturn-over   ngadto sa kapolisan sa Carmen niadtong pagka- Biyernes na sa kaadlawon.

Samtang pagkabuntag na boluntaryong mitahan sa ilang kaugalingon sa kapolisan sila si Evy ug ang katabang nga si Asada. Sa paghimo ning balita aduna pay 11 ka mga biktima ang nakapirma og apidabit bahin sa kasong ilang ipasaka batok sa mga suspek.

Mokabat sa P120 mil ang processing fee nga nabayran sa mga biktima kay mao kini gipangayo sa mga suspek kanila.

Matud ni SPO2 Gibo nga namatikdan sa mga biktima nga giilad sila sa mga suspek dihang gipalarga sila ngadto sa Manila niadtong Septembre 12, 2011 alang sa orientation seminar apan pag-abot nila didto walay klaro ang giingong seminar tungod kay ang mamumulong nagpunay lang og estorbot o estoryang binutbot. (BANATNEWS)