Driver sa traysikol gibasol sa vendor

CEBU, Philippines - Gibasol sa mga vendor sa Lagtang public market   sa dakbayan sa Talisay ang mga drayber sa traysikol sa   maong dakbayan   sa kamenus na sa mga mangomprahay og isda didto sa maong merkado tungod kay paninglan sila og dobleng plitehan sa maong mga drayber.

Si Marivic Lasquete usa sa mga vendor og isda nagkanayon nga kasagaran sa ilang mga isda madubok nalang kay walay mamalit .

Ang ilang gihimo mao nalang ang pagbuwad sa ilang mga isda aron makabawi sila og dyutay sa ilang puhonan.

Apan matud pa ni Lasquete nga matag adlaw kanunay na silang alakanse.

Mitug-an si Lasquete nga kaniadto sa didto pa sila sa Tabunok public market, ang 300 kilos niyang isda kuwang kaayo matag adlaw.

Apan karon sa 300 kilos niyang komprahon sa Pasil, labing daghang mahalin matag adlaw mao ang 20 kilos.

Busa gawas sa buwad gitun-an nila ang paggamos sa ilang mga isda nga dili mahalin sumala ni Lasquete.

Samtang ang mga drayber sa traysikol mibahad nga bisan unsay mahitabo dili sila mosunod    sa awhag sa kagamhanan pagpahunong kanila gikan sa pagpaningil og dobleng plite sa ilang mga pasahero nga moadto sa Lagtang.

Kini tungod kay naandan na nilang panginabuhi sukad pa kaniadto nga taliwala sa Lagtang ug Tabunok, moplite gyud og hustong plitehan ang mga pasahero nila.

Sayo niini giawhag ni Vice Mayor Alan Bucao ang mga apektadong pasahero sa pagtaho ngadto sa ilang buhatan sa mga drayber sa traysikol nga mangolekta og doble nga pasahe.

Samtang mibahad usab ang mga drayber sa traysikol nga mowelga sila kun pugngan sila sa kagamhanan gikan sa ilang naandang singil sa plite matag pasahero nga molabang tali sa Lagtang ug Tabunok. 

Usa ka drayber nga wala magpaila nagkanayon nga dili sila mahadlok og polis ug andam sila sa ilang kaugalingon nga magpakamatay kun gikinahanglan.

Kasagaran sa mga mangomprahay, anha nalang kutob sa Tabunok kay kun molahos sila ngadto sa Lagtang, paninglan sila og lain na usab nga plite sa mga drayber sa traysikol.

Si Presiosa Comahig taga Bulacao nagkanayon nga aron kalikayan nila ang lalis, anha nalang sila mangompra sa Tabunok imbis moadto pa unta sila sa Lagtang. Ang mga tigpaniid nagkanayon nga gawas lang kun mapitol sa kagamhanan ang mga drayber sa traysikol, magpabilin kining dili motuman og balaod nga maoy ikabangkarota sa mga vendor sa Lagtang.(WC) (BANATNEWS)