Cebu media gidayeg sa DSWD

CEBU, Philippines -  Gibutyag kagahapon sa public information officer sa Department of Social Welfare and Development (DSWD)-7 nga si Jaybee Carillo nga mituman gyud saktong pamaagi sa pagbalita sa mga sensitibong isyu sa kabataan ug kababayen-an ang mga sakop sa media dinhi sa Sugbo.

Kini maoy gisaysay ni Carillo atol sa gihimong forum sa mga tinubdan sa balita nga gipahigayon sa social hall sa Cebu City Hall kagahapon.

Ang maong kalihukan gipasiugdahan sa Kapisanan ng Brodkaster ng Pilipinas-Cebu Chapter kinsa nagselebrar sa ilang Broadcasters’ Month.

Matud pa ni Carillo nga nabantayan niya nga ang mga sakop sa media sa Sugbo mabinantayon kanunay sa paghatud sa balita partikular na sa paghisgot sa mga pangalan ug biktima kung angayan ba kini ipublikar.

Samtang si Cebu City Police Director Senior Supt. Ramon Melvin Buenafe mihulagway usab sa mga sakop sa media sa Sugbo nga tulin nga mohatag og balita ug wala pa siya kasugat og dinagkong problema niini.

Nanghinaut hinuon siya sa media nga dili pasobraan ang balita ug ihatud gyud ang impormasyon base sa ilang gipanulti ug dili kini angayan nga himuong rason nga makapaaway sa personalidad sa gobiyerno.

Dugang pa ni Buenafe nga responsibilidad sa mga nagtrabaho sa gobiyerno nga mohatag og impormasyon ngadto sa media sanglit mao kini ang tulay ngadto sa publiko kung duna sila’y mga importante nga anunsiyo alang sa katawhan.

Gawas sa Broadcaster’s Month, buksan usab karong adlawa ang tinuig nga Press Freedom Week nga buksan pinaagi sa usa ka parade nga manukad sa Plaza Sugbo sa City Hall paingon na sa Kapitolyo diin himuon ang Santos nga Misa ug ang pormal nga programa nga tambongan sa mga sakop sa media nga nagikan sa print ug broadcast. (BANATNEWS)