CEBU, Philippines - Padayon ang imbestigasyon sa Investigation Detection and Management Bureau (IDMB) sa Mandaue City Police Office (MCPO) kalabot sa pag-ambush sa usa ka negosyanteng babaye alas-6 pasado ang takna sa miaging gabii sa dalan Andres Soriano Avenue ug eskina dalan Plaridel sa barangay Looc, dakbayan sa Mandaue.
Ang biktima nga namatay mao si Irish Hugo, 37, taga sitio Villa Manga sa barangay Opao sa maong dakbayan ug tag-iya sa Stockland International Furniture diha sa Zone Gabi, Paknaan sa samang dakbayan.
Ang biktima nanag-iya usab og dakong piggery sa lungsod sa Argao, giingong bulag sa iyang bana ug nakigpuyo sa iyang hinigugmang buwag na usab sa asawa.
Nagmaneho ang biktima sa kaugalingong sakyanan ug kuyog ang kapuyo nga si Crisostomo Alcala nga usa ka insurance agent sa mga sakyanan ug ang ilang electrician nga si Ruel Relabo ug higala nga si Irene Canedo dihang nahitabo ang pagpamanhig.
Si Alcala sumala pa sa kapolisan usa ka fixer sa Land Transportation Office ug kaniadto nadakpan na sa entrapment operations sa kapolisan human ireklamo sa iyang mga kliyente. Si Alcala ug kaubanan wala maunsa sa maong pagpamanhig.
Si Inspector Rex Lomente, hepe sa IDMB nagkanayon nga gikan pa sa Land Transportation Office (LTO) sa barangay Looc sa Mandaue City ang mga biktima padulong sa sitio Maayaay sa barangay Obaob sa lungsod sa Argao aron bisitahon ang gibuksan niining piggery sa maong lugar.
Subay sa ilang gihimong pakisusi nasuta nga gisundan na daan ang sakyanan sa mga biktima gikan sa LTO sa barangay Looc ug sa paghunong sa eskina kalit lamang kining gipusil sa makadaghang higayon dayong pabulhot og padagan sa ilang motorsiklo sa mga kriminal. Si PO2 Marvin Fegarido sa Homicide Section sa MCPO nga nahinabi sa Banat News miingon nga nakakuha sila og unom ka mga kabhang sa kalibre .45 nga gituohang gikan kini sa armas sa mga gikatahapan.
Ang kapolisan padayon pang nagsubay sa mga impormasyong ilang nadawat aron pagtumbok sa mga gikatahapan apan usa sa ilang gisubay mao ang anggulo sa love triangle, negosyo ug ang sa habig sa pagka-fixer ni Alcala. (BANATNEWS)