Australian nanghinol og 10-anyos

CEBU, Philippines - Subling gibalhog sa karsel sa kapulisan ang Australian national nga una nang nabilanggo tungod sa pagdala og marijuana sulod sa police station sa kapulisan sa milabay’ng semana apan ning higayuna gireklamo na usab kini nga nangmolestiya og usa ka 10-anyos nga batang babaye.

Nahitabo kini sa usa sa mga barangay sa lungsod sa Argao niadtong Biyernes sa alas 8:25 sa gabii.

Samtang ang suspek mao si Gary Frank Brough, 68, nagpuyo sa barangay Langtad lungsod sa Argao.

Matud ni PO2 Benjamen Gerozaga, desk officer sa Argao Police dihang nahinabi sa Banat News, ang uyoan sa biktima maoy nakadiskubre sa suspek nga gihinol ang pribadong parte sa lawas sa iyang pag-umangkon sayo nianang gabhiona sa gawas nga bahin sa panimalay sa bata.

Daling misumbong sa mga tanod ang uyoan ug gidakop ang suspek ug dayun gi-turnover sa kapulisan uban ang pamilya sa biktima nga maoy mipa-blotter sa hitabo.

Ang suspek nagtingkagol na karun sa karsel samtang nagpaabot sa tukmang kaso nga ipasaka sa mga sakop sa Women and Children’s Desk sa kapulisan karong Lunes.

Matud ni Gerozaga ang maong langyaw dili pa kaayo dugay nakagawas sa bilanggo-an human kini gidakop tungod sa pagdala og mga linikit nga marijuana sud sa ilang buhatan sa kapulisan atol sa iyang pagduaw sa nabilanggo niining higala sayo karong bulana.

Gani niadto lang milabay’ng semana kini nakagawas human nakabutang og P200 mil nga piyansa.(EIM)  (BANATNEWS)