Pag-amendar sa RA 9344 hayan mahinayon

CEBU, Philippines - Nunot sa kadaghan sa nanawagan nga maamendar na ang kasamtangang Juvenile Justice and Welfare Act nga mao ang Republic Act 9344, malaumon si Deputy House Speaker Pablo Garcia nga mapasar gyud ang balaudnon nga anaa na sa Kongreso.

Gipahibawo ni Garcia nga ang technical working group sa Ubos Bay-Balauranan nahuman na sa ilang paghiusa sa nagkalain-laing bersyon sa balaudnon.

Sa niaging semana, si Senador Vicente Sotto III mipahibawo usab atol sa iyang pagbisita sa Sugbo nga ang Senate Committee on Justice niaprobar na sa balaudnon ug gikatakda na kining tukion sa plenaryo.

Matud pa ni Garcia hayan maaprobahan na usab sa Ubos Bay-Balauranan ang ilang balaudnon.

Usa sa giduso ni Garcia nga mahimo na nga manubag sa balaud ang makasala nga nag-edad og 10-anyos apan ilang nasabutan sa mga kongresista nga kutob lang 12 anyos.

Si Sotto miduso usab nga mahimo na nga kriminal ang 11-anyos nga makalapas sa balaod ug mamahimong masilotan ug kini gisuportahan usab sa ubang kongresista ug ubang opisyal sa kapolisan sa Sugbo.

Sa pagkakaron ang nag-edad og 17-anyos paubos walay tulubagon sa balaud Republic Act 9344 maong gituohan nga nakapadaghan sa krimin nga nahitabo.

Sila si Sr. Supt. Melvin Ramon Buenafe sa Cebu City Police Office ug si Sr. Supt. Patrocinio Comendador pulos uyon sa maong lakang gumikan sa mga krimeng binuhatan sa kabataan.

Base sa RA 9344 ang nag-edad og 17-anyos paubos gimando nga dili pasilotan o walay criminal liabilities sa krimeng nabuhat tungod sa kalinghod pa sa ilang panghuna-huna. (BANATNEWS)