Amerkano gipusil sa kawatan

CEBU, Philippines - Naangol ang negosyanteng American national human gipusil sa kawatang misulod sa iyang lawak nga iyang gigukod diha sa ilang balay sa Villas Magallanes sa barangay Agus, dakbayan sa Lapulapu alas-10 pasado ang takna sa miaging gabii.

Ang biktima mao si John William Mallory III, taga San Jose California, USA ug temporaryong nagpuyo sa Block 4, Lot 10 sa Villas Magallanes Subdivision.

Si Inspector Zenaido Pastorfide Jr,, sa Homicide Section miingon base sa gitug-an sa biktima kanila nasugatan niini ang wala hiilhing lalaki nga migawas gikan sa iyang lawak.

Diha-diha mikaratil pagdagan ang lalaki pagkakita sa biktima hinungdan nga iyaha kining gigukod apan pag-abot sa gawas mihunong ang maong lalaki ug mipusil kaniya sa walang dapidapi.

Human niini daling misuot ang maong lalaki sa kabalayan ug wala na igkita samtang ang nalup-og nga biktima gitabang ug gidala sa tambalanan.     Sa pagsusi sa kapolisan sa iyang lawak nahanaw na ang $400 sa iyang pitaka nga gituohang gikuha sa kawatan. (BANATNEWS)