Dalaga nadasmagan sa motor naligsan sa PUJ

CEBU, Philippines - Namatay ang usa ka dalaga human kini dasmagi sa usa ka PUJ sa iyang paglabang sa dalan M.C. Briones sa eskina sa Sudlon, Maguikay, ug Ibabao Estancia, dakbayan sa Mandaue sa miaging gabii.

Ang namatay mao si Maria Bresila Bantigue Luna, 22 , dalaga nga nagpuyo sa Villa Fatima sa sitio Sudlon sa barangay Maguikay, sa maong dakbayan.

Si SPO4 Eleazar Saromines, imbestigador sa traffic division sa Mandaue City Police Office (MCPO) nga nahinabi sa Banat News miingon nga gikan pa sa trabaho sa dakbayan sa Sugbo ang biktima uban sa iyang kauban nga si Cristina Ortega, 27 , nga taga sitio Sudtonggan, barangay Basak, dakbayan sa Lapulapu.

Si Ortega mibutyag sa kapolisan nga nagdungan unta sila si Luna sa paglabang sa karsada apan may taxi nga kusog kaayong nagdagan nga nagpaingon sa ilang nahimutangan maoy hinungdan nga wala na lamang siya modayon sa paglabang.

Apan si Luna kinsa nahinayak sa paglabang milihay apan gidagit usab kini sa naghaguros nga motorsiklo nga giluwanan sa   wala hiilhing lalaki.

Mibarag lang ang motorsiklo ug wala matumba ug nakapadayon kini sa padagan pahilayo sa maong lugar ug ang biktima nga nalamba sa taliwala sa karsada naligsan usab sa   laing PUJ nga nagbaguros sa kakusog nga nagdala sa plate number GWF 352 nga gimaneho usab ni Michael Ababa, 24 nga taga Maghaway sa dakbayan sa Talisay.

Si SPO4 Saromines miingon nga gumikan sa kakusog wala dayon kaalinggat ang drayber nga may nadasmagan siya ug namatngonan nalang nga ang biktima   napasok sa ilawom sa jeep ug naguyod kini sa gilay-ong 88.3 metros nga maoy hinungdan sa hinanali   niyang kamatayon.

Matud pa ni SPO4 Saromines nga dali untang gidala ang biktima sa Mandaue City District Hospital apan gideklarar kini sa mga doktor nga dead on arrival.

Si Ababa kinsa mitahan sa iyang kaugalingon gitanggong na karon sa prisohan samtang gihikay na ang kiha nga isang-at sa tagtungod batok kaniya.(WC) (BANATNEWS)