Ex-Tanod sikop sa buybust

CEBU, Philippines - Nadakpan sa buy bust operation sa kapolisan ang kanhi barangay tanod ug paryente sa barangay kapitan sa Agus, dakbayan sa Lapulapu kinsa nasakmitan og tulo ka paketeng gidudahang shabu ug mga armas nga kalibre .45 ug kalibre .38 uban sa mga buhing bala niini.

Ang nadakpan mao si Emilio Oyao, 46, nga giingong paryente ni barangay kapitan Remegio “Bo” Oyao sa nahisgutang barangay sa maong dakbayan.

Si SPO1 Jupiterno Norab sa operations division sa Lapulapu City Police Office (LLCPO) nga nahinabi sa Banat News miingon nga si Inspector Glenn Hife sa City Anti Illegal Drug Task Force (CAIDSOTF) maoy nangulo sa buy bust operation nga ilang gipahigayon.

Sumala pa nakadawat ang kapolisan og report kabahin sa kalambigitan sa suspek sa pagpamaligya og ilegal nga drugas diha sa maong barangay.

Ang buy bust operation natigayon pinaagi sa ilang police decoy nga mipalit og shabu sa kantidad nga P600 ug dihang gitunol sa suspek ang ilegal nga drugas gisignit kini.

Duha ka mga kaso nga naglakip sa kalapasan sa Republic Act 9165 kon Comprehensive Dangerous Drug Act ug kalapasan sa Republic Act 8294 kon illegal nga paghupot og armas ang ipasaka batok kaniya. (EIM) (BANATNEWS)