2 Babaye gigapos sa tulisan

CEBU, Philippines - Napalgang ginapos na ang duha ka mga babaye sulod sa ilang kaugalingong pansayan human mabiktima sa pagpanulis sa sitio Humay-humay barangay Gun-ob dakbayan sa Lapulapu.

Ang mga biktima mao si Paulina Reyes, 49, ug Teresa Ycong, 24, pulos mga residente sa maong dapit.

Midangop sa kapulisan sa Presinto 3 sa LCPO ang duha human kini gitabang sa ilang mga silingan gikan sa pagkagapos human sa nahitabong pagpanulis kanila.

Matod pa ni Reyes mga alas 1:45 sa milabay’ng Miyerkules sa hapon dunay nanuktok sa ilang panimalay ug sa pag-abli ni Ycong duha ka mga lalaking armado sa armas mobuto ang nanulod dayong deklarar og tulis.

Gumikan sa ilang kahadlok wala na sila manukol pa ug milampos ang duha pagkuha sa usa ka laptop ug ang ilang mga personal nga gamit lakip na ang ilang salaping cash.

Wala pa gyud matagbaw ang mga tulisan ilang gigapos ang duha ug gisulod sa ilang kaugalingong pansayan.

Sa dihang ilang nabatyagan nga misibat na ang mga tulisan misinggit sila pagpangayo og tabang sa mga silingan kinsa daling misulod sa ilang balay ug mitangtang sa ilang pagkagapos.

Mapasalamaton si Reyes ug Ycong nga igo lamang silang gigapos ug gibutang sa pansayan ug wala kini pasipad-i sa mga tulisan atol sa maong pagpanulis.

Hangtud ning pagbalita blanko pa ang mga pulis kung kinsa ang responsable sa maong insidente. (EIM) (BANATNEWS)