Landing shrine ipaayo

CEBU, Philippines - Ang konseho sa dakbayan sa Talisay nangayo og pundo alang sa pagpa-renovate o pagpaayo na usab sa landing shrine nga nahimutang sa baybayon sa barangay Poblacion.

Kini pinaagi sa upat ka resolusyong giaprobahan sa konseho sa maong dakbayan nga nangayo og P5 milyones nga pundo alang sa renovation sa landing shrine.

Ang nahisgutang shrine mao ang mga hulagway sa mga sundawo nga naglakaw sa dagat sa baybayon sa Talisay gikan sa barkong Amerikanhon nga midunggo sa maong lugar niadtong Marso 26, 1945 aron pagmontar sa ilang puwersa batok sa mga sundawong Hapon nga nagtampunsisok na dinhi sa lalawigan sa Sugbo.

Ang upat ka resolusyon nga gipangamahanan ni Bise Mayor Alan Bucao nangayo og P3 milyones kang Kongresista Eduardo Gullas, P1 milyon kang Gobernador Gwendolyn Garcia, P500 mil kang Bokal Julian Daan ug P500 mil usab kang Bokal Sergio Restauro.

Ang tipik sa resolusyon nagkanayon “Whereas, this August body finds and believes that maintaining the cultural heritage of the city is vital to it’s people’s historical knowledge”.

Ang maong landing shrine natukod sayo sa tuig 1990 ug matud ni Bucao   nga   duha pa ka higayong napaayo kini.

Gibutyag usab sa bise mayor nga tungod sa kaparat sa dagat, dali ra gyud magabok ang mga materyales niini, masemento man o maputhaw kay kaunon man sa taya busa nagkinahanglan gyud kini og maayong pag-atiman sa kagamhanan.

Ang ulahing renovation niini gihimo niadtong 2009 dihang gipabarog ang pito ka mga estatuwa nga nagpresentar sa mga sundalong Amerikano ug Pilipino kinsa midunggo sa   maong baybayon.

Mikabat ngadto sa P3 milyones ang nagasto sa pagpagama ug pagpabarog sa maong mga estatuwa ug laing P3 milyones ang nagasto usab sa unang renovation sa tibuok shrine.

Si Bucao nagkanayon nga ang maong lugar usa ka historical landmark diin angayan lang nga ang mga lokal ug langyaw nga mga bisita nga moduaw sa maong lugar modayeg niini.  - BANAT NEWS