Tulisan sa Mindanao nia na sab

CEBU, Philippines - Laing grupo na usab sa mga banggiitang tulisan gikan sa Mindanao ang ania karon sa Sugbo sumala ni Chief Insp. Romeo Santander, hepe sa City Intelligence Branch (CIB) sa Cebu City Police Office kagahapon.

Gibutyag ni Santander    sa taga media nga ang impormasyon kalabot sa bag-ong grupo sa mga tulisang taga Mindanao nga ania sa Sugbo nadawat nila niadtong Huwebes. Matud ni Santander nga kining maong grupo gitawag kining sub-group   o kaubang grupo nila ni Jun-Jun Cabando, ang tulisang naangol atol sa gilusad nilang tulis sa usa ka kahero sa China Bank sulod sa Robinsons Department Store   sa uptown ning dakbayan sa Sugbo sa miaging semana.

Napanglantawan ni Santander nga ang ka agresibo ning maong grupo sa pag-anhi sa Sugbo mao ang pagpanimawos sa kamatayon sa tulo ka mga tulisan nga kauban ni Cabando.

Sila mao si Mario Dapitan, Antonio Adelan ug Nelson Magsalay kinsa napakyas sa ilang pagpanulis kay pulos sila nakabsan sa kinabuhi.

Wala lang hisayri ni Santander kun panulis ba kaha tuyo ning mga tawhana o kaha pagpamatay sa kapolisan kinsa maoy mipuo ug mihabas sa ilang mga kauban.

Sa pagkakaron gipanid-an na sa kapolisan ang posibleng lugar nga gipuy-an niining mga tulisana karon ug giawhag ni Santander ang katawhan nga dili mohikaw sa pagpahibawo sa kapolisan kun makapaniid sila og grupo sa mga tawo  nga magpuyo sa usa ka lugar nga katahapan ang mga lihok.

Labaw sa tanan gipaandam ni Santander ang posibleng target niining mga tulisana, sama sa mga bangko, uban pang establisemento nga kuwartahan.

Ilang gipabantay pag-ayo ang mga security guard sa   nagkalainlaing establisemento nga magmabinantayon pag-ayo uban sa ilang mga armas nga kasaligan ug panalipdan una sa tanan ang ilang kaugalingon ug ang palibot sa lugar nga ilang gibantayan.

Apan labaw sa tanan gipasidan-an ni Santander ang kapolisan nga kinahanglang magmaigmat   uban sa ilang mga armas ug mga bala aron kapanalipdan nila ang ilang kaugalingon ug ang publiko nga ilang gialagaran.  - BANAT NEWS