Usa naangol sa sunog

CEBU, Philippines - Usa ang naangol sa naugdaw’ng balay sa barangay San Isidro sa lungsod sa San Fernando niadtong miaging gabii sa alas 7:00 ang takna.

Ang tag-iya sa naugdaw nga panimalay mao si Flordeliz Bacusmo, 34, molupyo sa maong lugar samtang ang napaso ang silingan niining si Eden Manlosa kinsa mitabang sa pagpawong sa kalayo.

Nadawat sa kabomberohan ang alarma sa sunog alas 7:00 ang takna ug sulod lang sa dos minutos nakontrolar ang kalayo ug wala na makatabok sa sikbit nga kabalayan tungod usab sa pagtinabangay sa mga silingan pagsumpo niini.

Si FO3 Roseller Generalao, fire investigator sa San Fernando Fire Station mibanabana sa kinatibuk-ang danyos nga moabot og P40 mil.

Si Manlosa nakaangkon og paso sa walang bukton atol sa pagtinabangay nila og pawong sa kalayo.

Matud ni PO1 Edgar Enclonar, desk officer sa San Fernando Police Station nga gikahinabi sa Banat News base sa pamahayag sa kabomberohan nagsugod ang sunog sa gidagkutang kandila sa anak ni Flordeliz nga si Labella nga nataligam-an niini.  - BANAT NEWS