Pinabuthang isda nagkaminus

CEBU, Philippines - Nagkaminus na ang gidaghanon sa mga pinabuthang isda nga gipasulod sa mga kamerkadohan dinhi sa siyudad sa Sugbo.

Kini tungod sa subsob nga kampanya sa kagamhanan sa lalawigan batok sa illegal fishing pinaagi sa pagpalihok sa Cebu Provincial Anti-illegal Fishing Task Force. Sumala pa sa Task Force Team Coordinator Jojo Merencillo nga nakita nila karon ang dakong epekto sa ilang subsob nga kampanya batok sa illegal fishing ilabi sa mga isdang pinabuthan.

Matud pa ni Merencillo nga niini lamang tuiga mikabat na og kapin sa P1 milyon nga balor sa isdang nakuha sa ilegal nga paagi sa panagat nga   nasakmit sa mga otoridad.

Nagtuo si Merencillo nga ang mga illegal fisher lakip na ang mga mopalit sa mga pinabuthang isda nahadlok na nga masakmitan sa ilang mga produkto tungod kay nagkahulogan kini sa kadako sa ilang alakanse.

Kini ang hinungdan nga sa miaging mga semana minus na kaayo ang nasakmit sa mga sakop sa Provincial Anti-illegal Fishing Task Force.

Ang pagtukod sa maong task force gihimo ni Governor Gwendolyn Garcia   dihang nasuta sa gobernador ang paghitak sa illegal nga matang sa panagat. 

Matud pa sa gobernador nga kinahanglang ipadayon ang kaigmat sa mga sakop sa task force aron malugda ang mga   mananagat sa pagpadayon sa ilegal nga matang sa panagat.  - BANAT NEWS