Polis gikulata sud sa diskohan

CEBU, Philippines - Usa ka pulis nga miresponde sa kagubot nga miulbo sulod sa diskohan nawingig human kini kulataha sa duha ka tawo nga iya untang dakpon didto sa basketball court sa barangay Tubod sa lungsod sa Asturias sa miaging kaadlawon.

Ang biktima mao si PO2 Emmanuel Blones sakop sa Asturias Police Station, samtang ang mga suspetsado mao sila si Frane Capangpangan, 22, ug Kirki Norguillo, 25, pulos taga barangay Manguiao sa naasoyng lungsod.

Sumala sa kapolisan, ang grupo nila ni Capangpangan ug Norguillo maoy sinugdanan sa kagubot   dihang nanghasi kini sulod sa   diskohan hinungdan nga nahunong ang sinayaway   sa mga nanisko ug nag-iyahay sa panagan.

Busa isip maoy gipiyalan sa pagbantay sa   maong disko, giduol ni Blones ang mga suspetsado uban sa mga barangay tanod sa maong lugar aron dakpon ang mga suspetsado.

Apan wala kini makahimo sa pagdakop sa mga suspetsado kay gitabangan man siya og kulata.

Hinuon bisan kun nakulatahan, milampos gihapon siya uban sa mga tanod sa pagsikop sa mga suspetsado.

Si PO2 Dandreb Lambo sa Asturias police station nga gikahinabi sa Banat News sa telepono kagahapon sa hapon nagkanayon nga gidala na ang duha sa iyang mga kaubang pulis kagahapon paingon sa provincial prosecutors office alang sa pagpasaka og pormal nga kaso batok sa duha ka suspek.  - BANAT NEWS