Duha ka tulisan nadakpan

CEBU, Philippines - Nadakpan sa kapolisan ang duha ka suspetsadong tulisan nga nagsakay og motorsiklo human sa nahitabong ginukdanay alas 4 pasado ang takna sa miaging kaadlawon sa sitio Mustang sa barangay Pusok, dakbayan sa Lapulapu.

Ang nadakpan mao sila si Justin Secretarya Abancenia, 20, taga sitio Kagudoy sa barangay Basak sa dakbayan sa Lapulapu ug Rogery Agbay Ruelo, 28, taga barangay Jagobiao, dakbayan sa Mandaue.

Si Chief Inspector Conrado Manatad, hepe sa kapolisan sa Presinto 5 sa Lapulapu City Police Office miingon nga gitulis ang duha ka babaye nga paingon sa ilang trabaho sa Mactan Cebu International Airport (MCIA) nga sila si Benidecta Moreno, 21, ug Flordeliza Tolentino, 38, taga sitio Seaweeds, barangay Pusok sa maong dakbayan.

Naglakaw ang mga biktima sa maong dapit ug ang mga suspetsado nagpakaaron-ingnong nagpangutana kung asa ang Lapulapu gym apan dihang gitubag sa mga biktima kalit silang gitionan og armas dayong deklarar og tulis.

Nakuha sa mga tulisan ang shoulder bag sa mga biktima dayon misibat apan naagian sa Airport Police nga si Paricio Marindoque nga nagmotor ang mga biktima ug dali usab nga migukod sa mga tulisan.

Si Marindoque mitawag og backup nga sila si PO3 Roger Oriarte, PO2 Samuel Yballe, PO1 Leo Torres ug PO1 James Ares nga miresulta sa pagkasikop sa suspetsado.  - BANAT NEWS