14-anyos nalatayan og trak

CEBU, Philippines - Patay ang usa ka 14-anyos nga batang lalaki human nalatayag ligid sa prime mover sa dihang napasok sa ilawom sa miaging hapon diha sa dalan McArthur Boulevard ug S. Osmeña sa barangay Tinago siyudad sa Sugbu.

Ang biktima giila sa kapulisan nga mao si Arisparco Navarro Campugan, 14, taga sitio Silingan Uno sa barangay Tinago.

Ang nakaligis mao ang prime mover truck nagtangag sa plakang GWH-348 gipanag-iya sa MCT Transport Cargo ug gipaneho ni Tarciso Niluag, 42, nga taga 3rd Avenue Reclamation area sa barangay Mabolo.

Si Manuel Tagaan sa records section sa Traffic division nga nahinabi sa Banat News nagkanayon nga subay sa gihimong imbestigasyon ni SPO3 Ramon Budiongan naghunong si Niluag niadtong higayona diha sa nahisgutang lugar kay stop signal.

Sa dihang ni go signal, miabante si Niluag apan mikalit siya og brake sa dihang iyang nabantayan nga daw dunay nilagapak sa ilawom ug nahibaw-an nalang niya duna siya’y naligsan.

Sumala pa nga adunay mga nakakita nga ang biktima adunay kaubang laing batan-ong lalaki nga mikatkat sa trak sa dihang mihunong kini sa stop light apan pag-abante ni Niluag natagak ang biktima ug napasok sa ilawom.

Human matagak ang biktima nagdali og kanaog ang kauban niini ug midagan. Si Niluag sa interbyu nagkanayon nga nawala ang iyang bangil sa ligid nga puthaw ug iyang gidudahan nga gidala sa kauban sa biktima.

Ang mga biktima gidudahang maoy manaka sa mga trak de karga diha sa maong lugar nga mohunong sa stop signal ug manguha’g bisan unsang butang kutob sa ilang madala.  - BANAT NEWS