Policewoman nga 'adik' wa na igkita

CEBU, Philippines - Wala na igkita ang policewoman nga gidudahang tiggamitan og ginadiling drugas human napositibo sa gipahigayong random drug test sa lungsod sa Tuburan.

Ang iyahang kaso giduso na alang sa summary dismissal proceedings diha sa Police Regional Office-7 subay sa rekomendasyon ni Atty. Julius Ompad, hepe sa   Provincial Investigation and Detective Management Branch (IDMB).

Si Inspector Catalina Diotay, hepe sa Women’s and Children’s Protection Desk sa Cebu Provincial Police Office (CPPO) mipadala og sulat aron pabalikon sa iyang trabaho ang maong policewoman sa miaging semana human napakyas pag-adto sa iyang buhatan niadtong Agosto 24 diin mi-epekto ang relieve order niini.

Ang policewoman, 31, gipugngan ang pangalan sa Banat News napositibo sa paggamit og ginadiling drugas human sa gipahigayong random drug test sa CPPO ug PNP-Crime Laboratory-7 inabagan sa lokal nga kagamhanan sa lungsod sa Tuburan.

Si Ompad nagkanayon nga katapusan niyang nakit-an ang maong policewoman sa dihang iyang gipatawag ang atensyon niini diha sa iyang buhatan alang sa imbestigasyon.

“Ambot hain siya she failed to show up after the last time I called her,” matud pang Ompad.

Gidugang niini nga iya nang giduso ang resulta sa iyang imbestigasyon ngadto sa PRO-7 human gipirmahan ni Sr. Supt. Patrocinio Comendador, provincial director sa CPPO.

Samtang si Diotay mimando sa maong policewoman nga mopakita kaniya sulod sa lima ka adlaw kun madawat na niini ang sulat.

Sumala pa ni Diotay kun dili gyud mopakita ang maong policewoman sulod sa 30 ka adlaw mapugos siya sa pagrekomendar nga ipatangtang siya sa PNP roster nga nagpasabot nga dili na siya sakop sa PNP.

Katapusang impormasyon nga nadawat ni Diotay nga ang maong policewoman atoa na sa General Santos City.

“Okay lang unta to kung lalaki ang maingon ani pero mas makauuwaw man gud kay babaye pa jud,” matud ni Diotay kinsa mibutyag nga iyaha na kining gitambagang boluntaryong mopailawom sa drug rehabilitation apan wala tumana sa maong policewoman. - Ug RiaMae Booc The Freeman/EIM ( BANAT NEWS )