CEBU, Philippines - Nagkinahanglan og P1 milyon ang unom ka tawong nasikop ug nakuhaan og armas diha sa Mactan Cebu International Airport nga mga nagpailang sakop sa Interpol Commission sa milabay’ng semana.
Kagahapon sa buntag pormal nga napasaka ang kasong Illegal Possession of Firearms and Ammunitions, Usurpation of Authority ug Illegal use of Uniform sa piskaliya sa dakbayan sa Lapulapu.
Sa pakighinabi sa Banat News sa buhatan sa piskaliya sa dakbayan sa Lapulapu nasayran nga dako ang piyansa sa maghupot og armas nga walay lisensiya ug dili awtorisado.
Ang paghupot og high-powered nga kalibre sa armas sama sa kalibre .45 adunay P200 mil nga piyansa. Samtang wala pa usab masayri kung pila ang piyansa sa laing duha ka kasong giatubang sa mga suspetsado.
Atol sa pagkasikop sa unom ka suspetsado lima niini ang nakuhaan og kalibre .45 sila si Joeribe Comendador, Genaro Estoque, Edwin Adolacion, Asher Asotique ug Tirso Piñaflor sa ilang mga posesyon. - (BANAT NEWS)