2- anyos nalumos sa atabay

CEBU, Philippines -  Patay ang usa ka 2-anyos nga batang lalaki human kini matagak ug nalumos sa bangag nga himuonong atabay nga napuno na sa tubig uwan pasado alas-2 sa miaging hapon diha sa sitio Upper Torre sa barangay Inayawan siyudad sa Sugbu.

Si Philip Sabanto Jore, 2-anyos ug molupyo sa maong lugar napalgan sa iyang 4-anyos nga maguwang nga patay na sulod sa maong bangag nga napuno sa tubig.

Si Adelina Jore Rojo, 30, inahan sa bata mitug-an sa kapulisan nga gikan siya sa balay sa ilang silingan ug pag-abot niya sa ilang balay iya dayong gipangutana ang lain niyang anak nga 4-anyos kun asa na ang manghod niini.

Ang 4-anyos daling nangita sa manghod ug wala magdugay mibalik kini sa ilang balay ug mipahibawo nga naglutaw na kini sa maong atabay. - (BANAT NEWS)