Kagawad sakpang nag-repack

CEBU, Philippines - Usa ka kagawad sa barangay Sacsac sa lungsod sa Pinamungajan ang nasikop sa kapulisan uban sa laing duha ka lalaki usa niini iyang pag-umangkon diha sa iyang pinuy-anan sa Villagonzalo II sa barangay Tejero siyudad sa Sugbu sa miaging gabii kay naaktuhang nag-repack og shabu.

Laing 48 usab ka tawo ang nangadakpan sa kapolisan sa gihimong saturation drives sugod niadtong Septiyembre 7 hangtud niadtong Domingo.

Ang kagawad nga nadakpan mao si Bienvenido Lavandero Paslon, kagawad sa barangay Sacsac, Pinamungajan apan dunay balay diha sa nahisgutang lugar, iyahang pag-umangkong si Renato Diacabos Paslon ug Rocardo Sollano Arbiol.

Si Chief Insp. Bonifacio Garciano, hepe sa Investigation and Detective Management Branch (IDMB) sa Cebu City Police Office (CCPO) nga nahinabi sa mga tigbalita nagkanayon nga dugay na nilang gipanid-an ang pagpamaligya og ginadiling drugas sa suspek.

Sa miaging gabii nakadawat sila og impormasyon gikan sa ilang asset nga nag-repack na og shabu ang mga suspetsado diha sa balay niini hinungdan nga ilaha kining giadto ug naaktuhan pang nag-repack sa maong ilegal nga drugas ang tulo.

Nakuha sa kapulisan ang dose ka bultong shabu nga mokantidad og P300 mil, kwarta nga P3,050 nga gituohang halin niini, usa ka folding knife, mga gamit sa pag-repack, Identification Card (I.D) sa Department of Interior and Local Government Unit (DILG) ni Bienvenido isip kagawad sa Sacsac nga gipirmahan ni DILG Secretary Jessie Robredo ug .45 nga kalibre sa armas dunay magazine ug pito ka buhing bala nga gipanag-iya sa iyang pag-umangkon nga si Renato.

Matud ni Garciano nga anaa sa watchlist si Bienvenido ug ibutang na kini sa level 2 drug pusher sa Villagonzalo ug gituohan usab nga kini maoy nagsuplay sa lungsod sa Pinamungajan. Nasayran usab sa kapulisan nga nadakpan na sa Philippine Drug Enforcement Agency (PDEA)-7 sa miaging tuig si Bienvenido apan wala masayri kun nganong nakagawas kini sa bilanggoan.

Kalapasan sa Section 11 sa Republic Act 9165 ang giandam nga kaso sa kapulisan batok sa tulo samtang kasong illegal possession of firearms and ammunitions ang ipasaka usab nila batok ni Renato Diacabos Paslon.

Si Bienvenido nga gikuhaan og reaksyon sa mga tigbalita mihangyo nga dili lang siya motubag sa ubang mga pangutana kay ang iya nalang abogado maoy manubag niini.

Samtang gi-presentar usab kagahapon sa buntag ni Sr. Supt. Melvin Ramon Buenafe, hepe sa Cebu City Police Office (CCPO) ang 48 ka mga dinakpan gikan sa onse ka mga police stations sa ilang gipahigayong saturation drives dinhi sa dakbayan sukad niadtong Septiyembre 7 hangtud sa petsa 11. Matud ni Buenafe nga lakip sa nadakpan mao ang mga tawo nga dunay warrant of arrest. Ang mga dinakpan gipasakaan og kaso kagahapon.   (EIM) - (BANAT NEWS)