Negosyante di angay magkompiyansa

CEBU, Philippines -  Tanang mga balay patigayon sa dakbayan sa Mandaue gipahimangnoan sa kapolisan sa pagpalig-on sa ilang siguridad niining panahon nga nagkaduol na ang Pasko.

Si Chief Inspector Milven de Paz sa Mandaue City Police Office (MCPO) miingon nga ila nang gipasidan-an ang mga bangko, pawnshop ug tanang mga dagkong negosyo sa dakbayan nga angay na silang mangandam pag-ayo kay sila maoy rumbo sa mga dautang elemento ilabi na niining panahon nga maghinangat ang pasko.

Usa sa mga elementong dautan nga mosiaw sa panahon sa pasko mao ang mga tulisan, matud pa ni de Paz.

Midugang siya nga tungod kay sila mang mga negosyante kasagaran maoy rumbo niini, kinahanglang may lig-on silang panagang   sama sa ilang mga security guard, mga kahimanan sa komunikasyon ug uban pa aron di sila hidutlan sa mga tawong dautan.

Matud pa ni de Paz nga nakigtagbo na sila sa mga negosyante sa Mandaue kinsa nanag-iya og mga dagkong establisamento ug ilang gipahinumdoman nga pabantayan pag-ayo sa ilang mga guwardiya ang ilang mga balay patigayon.

Gipasabot niya nga ang kapolisan igo lang sa pagtubag sa alarma ug pagsikop sa mga kriminal.

Apan ang unang may tulubagon sa pagbutang sa seguro sa usa ka balay patigayon walay lain gawas mismo sa tag-iya niini.

Matud pa ni de Paz nga mahinungdanon kaayo nga may maayong bantay ang matag establisamento sama sa mga security guard nga may kompletong training alang sa iyang trabaho.

Matud pa niya dili maayo nga ang usa ka balay patigayon nga makabaton og guwardiya nga pakloy labi na kun magpunay lang og katulog sa ilang puwesto.

Si De Paz miingon nga ilang giawhag ang mga security guard sa mga financial establishment sa pagtaho gilayon sa ilang buhatan ug ngadto sa uban pang mga law enforcement unit kun makamatikod kini og tawo nga katahapan ang mga lihok.

Matud pa niya nga ang pagpalig-on sa siguridad sa mga financial establishment dinhi sa Sugbo labing gikinahanglan sanglit sa mga pagtuon nga ilang gihimo ilang nasuta nga mosaka ang mga panghitabo sa krimen kun magkaduol na ang pasko. (BANAT NEWS)