DILG mihimakak sa pasangil

CEBU, Philippines -  Giklaro sa Department of Interior and Local Government (DILG) 7 nga sukwahi sa gipublikar sa usa ka pamantalaan, wala sila mopagawas og ranking sa mga local government unit (LGU) sa natad sa performance sa upat ka mga aspeto sa panggobyerno.

Si Jerome Gonzales, OIC Provincial Director sa DILG7 sa pakighinabi sa mga tigbalita mipanghimakak sa pasangil nga naghimo sila og ranking sa mga LGU kay ang pagpadagan sa gobyerno   dili ikatandi sa usa ka contest. Iyang gipasabot nga ang    ilang   pagpang-apod-apod og mga porma nga may mga pangutanang ipatubag sa LGU usa ka gitawag nga self assessment alang sa mga pangulo sa departamento aron tun-an nila unsaon nila paggrado ang ilang kaugalingong serbisyo.

Matud pa niya nga mas maayo nang sila mismo ang mogrado sa ilang kaugalingon aron masukod nila kun angayan ba sila sa ilang ihatag nga grado sa ilang kaugalingon.

Hinuon matud pa ni Gonzales nga    maayo kaayo og performance ang lalawigan sa natad sa pang gobyerno.

Sayo niini gikuwestion ni Gobernador Gwendolyn Garcia ang napublikar nga resulta sa DILG Rating System.

Kini tungod kay kun basihan ang migawas nga resulta sa Local Government Performance Management System (LGPMS) State of Local Governance Performance Electronic, Report sa DILG sa milabayng tuig taas kaayo ang migawas nga rating sa probinsya sa Sugbo sa tanang aspeto sa panggobyerno.

Sama sa Administrative Governance nga naglakip sa Human Resource Management and Development sa natad sa Social Governance diin tipik niini ang health services; Environmental Governance sa natad sa Freshwater Ecosystem Management , Coastal Marine Management ug sa Valuing Fundamentals of Governance ug labaw sa tanan sa natad sa transparency diin ang   labing taas nga grado nakuha sa lalawigan. (BANAT NEWS)