Gipatay sa batan-ong gibadlong

CEBU, Philippines -  Patay ang usa ka tawo nga biktima sa pagpamusil sa barangay Labogon, dakbayan sa Mandaue ala-una pasado ang takna sa miaging Domingo sa kaadlawon.

Ang namatay mao si Keneth Viador, 28,nagpuyo sa maong dapit samtang ang suspetsado sa pagpamusil mao si Jessie Oporto nga taga sitio Kahumayan sa nahisgotang barangay sa dakbayan sa Mandaue.

Si SPO2 Danilo Barrita sa kapolisan sa Presinto 3 nga nagbase sa   Basak Police Station nga nahinabi sa Banat News miingon nga kuyog sa biktima ang iyang higala nga si Raymond Dasig.

Sa ilang paghidangat sa sitio Kahumayan aron unta mopalit og ilimnon sa usa ka tindahan sa maong dakbayan nalabyan nila ang pundok sa mga batan-on nga pwerteng banhaa.

Nunot niini giingong gibadlong sa biktima ang mga batan-on apan usa sa mga batan-on ang kalit nga mipusil sa biktima.

Matud pa ni Barrita nga daling gidala ang biktima sa Mandaue City Hospital apan gideklarar kini sa mga doktor nga dead on arrival.

Hinuon ang kauban sa biktima nga si Dasig nga nakasaksi sa maong pagpamusil miila sa suspetsado nga si Jessie Oporto nga nagpuyo usab sa maong dapit kinsa dali usab kaayong nakasibat pahilayo. (BANAT NEWS)