Gwen milarga sa Japan
CEBU, Philippines - Gitambungan ni Governor Gwendolyn Garcia ang Tsuneishi Group’s Annual Miruko Fiesta, didto sa Japan kagahapon, Septiyembre 10.
Una siya migikan niadtong Biyernes, ang gobernador nagkanayon nga usa ka dakong garbo nga naimbitar siya sa nahisgutang kalihokan sa nasud sa Japan ilabina gikan sa usa sa mga dakong kompanya sa maong nasud.
Ang gobernadora miingon nga dili siya makabalibad sa nahisgutang imbitasyon sa tagdumala sa Tsuneishi tungod kay usa kini sa pinakadakong investor dinhi sa Sugbo pinaagi sa ilang shipbuilding company didto sa lungsod sa Balamban nga nakatabang sa kaliboan ka mga Sugboanon pinaagi sa paghatag niini og trabaho sa ilang kompanya.
Giklaro usab sa gobernador nga ang miimbitar kaniya mao gyud mismo si Hitoshi Kono ang presidente sa nahisgutang kompanya aron sa pagsiguro nga makatambong gyud siya sa nahisgutang kalihokan.
Sigun pa sa gobernador nga ang presidente sa nahisgotang kompaniya mao pay nangunay sa paglibre sa iyang biyahe paingon sa nasud sa Japan. - Chester Abadilla/WC (FREEMAN)
- Latest
- Trending
