Flyover makapasamot sa suliran sa trapiko

CEBU, Philippines - Makahatag lang og dugang suliran sa dagan sa mga sakyanan ang flyover nga giplano sa Department of Public Works and Highways (DPWH) 7 nga itarok sa dalan Ouano Avenue sa barangay Centro ug eskina sa dalan Plaridel sa barangay Centro sa dakbayan sa Mandaue sumala ni Architect Florentino Nimor sa City Planning and Development Office (CPDO).

Si Nimor miingon nga gigahinan kini sa nasudnong kagamhanan og mokabat sa P1.7 bilyon nga kantidad alang sa tulo ka mga flyover sa dakbayan.

Apan gitataw niya nga bisan pa kun adunay giaprobahan nga gahin ang nasudnong kagamhanan alang sa maong proyekto, mahimo ra kining gamiton    sa laing proyekto kun dili mahinayon ang pagtukod sa flyover

Kini tungod kay dili man matukod ang usa ka proyekto kun dili kini iindosar sa   mga opisyales sa kagamhanang lokal. Usa sa mga paagi una kini kauyoni sa kagamhanang lokal mao ang pagpahigayon og public hearing aron mapaminaw ang pulso sa Mandauehanon.

Ang konseho sa dakbayan dako usab kaayo og papel alang sa katumanan sa maong proyekto.

Apan kun ang mga magbabalaod sa dakbayan maoy unang dili makauyon niini, walay paglaum nga ikapatuman ang maong proyekto.

Sayo niini mipasabot ang DPWH nga ang katukoran sa tulo ka flyover sa Mandaue   gikinahanglan kaayo aron makatabang sa pagpaluag sa dagan sa trapiko sa siyudad. - Romeo T. Limpangog/WC (FREEMAN)